मुगु । मुगुमा एकै परिवारका चार जनाको विभत्स हत्या भएको छ । छायाँनाथ रारा नगरपालिका–६, मन्दु भन्ने गाउँमा आमासहित तीन छोराछोरी गरी चार जनाको हत्या भएको हो ।
जिल्ला प्रहरी कार्यालय, मुगुका अनुसार २८ वर्षीया श्रीदेवी बोहोरा र उनका दुई छोरा र एक छोरीको हत्या भएको हो । श्रीदेवीका ११ वर्षीय छोरा मनोज, ८ महिनाको छोरा रहर र ८ वर्षीया छोरी अप्सराको घर भित्रै हत्या गरिएको अवस्थामा गाउँले देखेपछि प्रहरीलाई खबर गरेको जिल्ला प्रहरी कार्यालय, मुगुका डीएसपी वीरेन्द्र थापाले बताए।
डीएसपी थापाकाअनुसार उनिहरुको हत्या दशैको टिकाको अर्को दिन राती भएको हुनसक्ने प्रारम्भिक अनुसंन्धानमा देखिएको छ ।
प्रहरीकाअनुसार श्रीदेवी बच्चाहरु लिएर ७ गते नै दसैँको टीका थाप्न सोही वडामा रहेको माइती गाउँ कोटिल्ला गएकी थिइन् । माइतीबाट उनी कार्तिक ८ गते बेलुका घर फर्किएको प्रहरी अनुसंन्धानमा पाइएको छ । तर, घटनाबारे प्रहरीलाई भने आज बिहान ११ बजे मात्रै खबर भएको थियो ।
स्थानिय गाउँलेले दुई दिनदेखि श्रीदेवी र उनका छोराछोरी कसैलाई नदेखेपछि घरमा आएर हेर्दा चारैजनाको घरभित्रै हत्या भएको देखेपछि प्रहरीलाई खबर गरेका थिए ।
श्रीदेवीका श्रीमान् वैदेशिक रोजगारीका लागि कतार गएका छन् । घटनाबारे थापा भएपछि उनि नेपाल फर्किन लागेको प्रहरीले बताएको छ ।
घटना अति नै संवेदनशील भएकाले विभिन्न कोणबाट अनुसन्धान भइरहेको प्रहरीको भनाई छ । घटनाबारे अनुसंन्धान गर्न प्रदेश प्रहरी कार्यालय सुर्खेतबाट तालीमप्राप्त कुकुरसहित अनुसन्धानको टोली मुगु पुगेको छ ।
