काठमाडौं । भुईमान्छेका सर्जक भनेर पहिचान बनाएका सुदूरपश्चिमका सर्जक खेम बतासद्वारा लिखित कथासंग्रह ‘बुढीपोल्ली’को विमोचन गरिएको छ ।
शनिवार काठमाडौंको शिल्पी थिएटरमा पुस्तक विमोचन गरिएको हो । विमोचन कार्यक्रममा कथासंग्रह ‘बुढीपोल्ली’ माथि भएको बहसमा सहभागीहरुले सर्जक र पुस्तकको उच्च प्रशंसा गरेका छन् । बहसमा सहभागी वक्ताहरुले सर्जक बतासले गरिब, दलित, भूमिहीनजस्ता भुइँमान्छेप्रति देखाएको सहानुभूतिको उच्च प्रशंसा गरेका हुन्।
बुढीपोल्ली विमोचनपछि पत्रकार फणीन्द्र संगमले सहजीकरण गरेको बहसमा लेखक / समालोचक बिन्दु शर्माले आञ्चलिकता र स्थानीय भाषा प्रयोगमा लेखक बतास सबल रहेको चर्चा गरिन्। समाज सदियौंदेखि चलिरहेको सांस्कृतिक उत्पीडनप्रति असहमति प्रकट गर्दै लेखकले नयाँ चेतनाको खोजी गरेको बताइन् । नेपाली साहित्यमा मानक भाषा र कुनै भाषिका वा मातृभाषाप्रति द्न्द्व नरहेको समेत उनको भनाइ थियो।
लेखक शर्माले छाउपडी प्रथासँग सम्बन्धित कथा ‘मान्छे हराएको सूचना’ को प्रसंग उल्लेख गर्दै मान्छे सामाजिक सोचसित डराउने भएकाले त्यो सोच बदल्नुपर्ने बताइन्। छाउ नमान्दा देउता रिसाउने भए छाउगोठ होइन देउताका मूर्तिहरु भत्काउनु पर्ने उनको भनाई थियो ।
यस्तै कवि / कथाकार बिना थिङले लेखक महिलाको विषय र चरित्र निर्माणमा सकारात्मक देखिएको बताइन्।
‘लेखकले आफ्नो भूगोलको कथा लेख्ने हो। बुढीपोल्लीमा सुदूरपश्चिमका कथाव्यथा छन् । यो नेपाली साहित्यका लागि फरक स्वाद पनि हो’, उनले भनिन् ।
बहसमा सहभागी लेखक राजन मुकारुङले कथाकारले उठाएका मुद्दामा आफू सहमत भएको भन्दै यी कथा सुदूरपश्चिमको मात्र नभई नेपालभित्रैका कथा रहेको बताए। कवि सोझो गाउँलेले खेमका कथा परिवेश र उद्देश्यमा निकै सफल रहेको भन्दै उनले प्रशंसा पनि गरे। लेखक मुकारुङले सामाजिक कुरीति र विभेदविरुद्ध सर्जक बतासले क्रान्ति नै गरेको बताए ।
कार्यक्रममा बोल्दै सर्जक बतासले कवितामा व्यक्त गर्न नसकिएका विषयलाई कथामा उठाउनकै लागि ‘बुढीपोल्ली’ जन्मिएको बताए । १२ वटा कथा संग्रहित बुढीपोल्लीमा पुस्तकलाई माया पब्लिकेसन काठमाडौले बजारमा ल्याएको हो ।
सर्जक बतासले सुदूरपश्चिमको डोटेली, थारु लगायतका स्थानिय भाषामा लेखेका कविताहरु निकै चर्चित छन् ।
