काठमाडौं। भारतीय प्रधानमन्त्री नरेन्द्र मोदीका विश्वास पात्रका रुपमा चिनिने भारतीय जनता पार्टी (भाजपा) का विदेश विभाग प्रमुख डा. विजय चौथाइवालेले नेपालमा भइरहेको राजावादी मुभमेन्टमा भारतको कुनै समर्थन नरहेको बताएका छन् ।
नेपाल भ्रमणमा रहेका नेता चौथाइवालेले आज माओवादी केन्द्रका उपमहासचिव वर्षमान पुन अनन्तसँग भेटवार्तामा यस्तो बताएका हुन् ।
नेपालमा राजतन्त्र फर्काउने गतिविधिमा भारतको कुनै समर्थन नरहेको र नेपालको वर्तमान संविधान र व्यवस्थाको पक्षमा रहेको चौथाइवालेले स्पष्ट पारेको उपमहासचिव पुनले बताए।
भारतीय नेता चौथाइवालेसंगको भेटवार्ता सौहार्दपूर्ण रहेको र भाजपा र माओवादी केन्द्रबीच सम्बन्ध अझ सुदृढ बनाउनुपर्ने बिषयमा छलफल भएको उपमहासचिव पुनले बताए।
भारतीय नेता चौथाइवालेले नेपाल भ्रमणका क्रममा प्रधानमन्त्री, पूर्वप्रधानमन्त्रीहरु लगायतसंग भेटवार्ता गरिसकेका छन् ।
