काठमाडौँ । नेपाली कांग्रेसले पार्टीको महाधिवेशन आउने फागुनको पहिलो साता गर्ने निर्णय गरेको छ । केन्द्रीय कार्यसमितिको सोमबार सम्पन्न बैठकले महाधिवेशन आउने फागुनमा गर्ने निर्णय गरेको हो ।
कोरोना महामारीका कारण तीन महिना पार्टीको काम रोकिए पनि महाधिवेशन भने फागुनमै गर्ने सहमतिमा सबै नेता पुगेका छन् । सोमबारको पार्टी बैठकले प्रदेश, जिल्ला, निर्वाचन क्षेत्र, पालिका र वडा तहको अधिवेशनको तालिका भने परिमार्जन गर्ने निर्णय गरेको छ ।
कांग्रेस बैठक प्रस्तावित नागरिकता विधेयक र केन्द्रीय महाधिवेशनको तालिकासम्बन्धी एजेण्डा राखेर असार १६ गतेदेखि सुरु भएको थियो । महाधिवेशनका लागि नयाँ प्रस्तावित तालिकामा क्रियाशील सदस्यताको नवीकरण, वितरण र छानबिन प्रकृया सकेर मंसिर मसान्तभित्र सम्पूर्ण सूची निर्वाचन आयोगलाई बुझाई सक्नुपर्ने उल्लेख छ ।
पार्टीका अन्तरिम संरचनासमेत अझै समायोजन भइसकेका छैनन् । जसले महाधिवेशनको तयारी अघि बढाउन कठिनाई परेको छ । पुरानो राज्य संरचनाका आधारमा रहेको पार्टीका संरचनालाई समायोजन गर्न कांग्रेसले मंसिरदेखि नै सुरु गरेको हो । २६ जिल्लाको समायोजन गर्ने काम साउन १० गते भित्र सक्ने पार्टीले लक्ष्य लिएको छ ।
त्यस्तै समायोजन नभएका जिल्लामा क्रियाशील सदस्यता वितरण र नवीकरण साउन मसान्तभित्र सक्ने र भदौ मसान्तभित्र सदस्यताको सूची केन्द्रमा पठाई सक्न मातहतका स्थानीय निकायलाई निर्देशन गरेको छ ।
महाधिवेशनको नयाँ तालिका
– फागुन ७, ८, ९ र १० गते : केन्द्रीय अधिवेशन
– पुस ६ गते : गाउँ नगर, वडा अधिवेशन
– पुस ८ गते : गाउँरनगरपालिका अधिवेशन
– पुस ११ गते : प्रदेशसभा क्षत्रीय अधिवेशन
– पुस १३ गते : प्रतिनिधिसभा क्षेत्रीय अधिवेशन र एक मात्रै प्रतिनिधिसभा निर्वाचन क्षेत्र रहेको जिल्लाका अधिवेशन
– पुस १६ गते : एकभन्दा बढी प्रतिनिधिसभा निर्वाचन क्षेत्र रहेको जिल्लाका अधिवेशन
– माघ ६ गते : प्रदेश अधिवेशन
