जाजरकोट । जाजरकोटमा बस दुर्घटना हुँदा ४ जनाको मृत्यु हुनका साथै अन्य ९ जना घाईते भएका छन ।
दुर्घटनामा परि मृत्यु भएका ४ जनाको शव घटनास्थलबाट निकालिएको र अन्य ९ जना घाइते यात्रुहरुको स्थानिय स्वास्थ्य चौकीमा उपचार भइरहेको जिल्ला प्रहरी कार्यालय जाजरकोटले जनाएको छ ।
प्रहरीका अनुसार मृतकहरुको सनाखत हुन सकेको छैन । दुर्घटनामा परी केही यात्रुहरु हराइरहेको र उनीहरुको खोजी कार्य जारि रहेको प्रमुख जिल्ला अधिकारी ललित कुमार बस्नेतले जानकारी दिए ।
घटनास्थलमा रुकुम पश्चिमको चाइना बगरबाट प्रहरी उद्धारका लागि खटिएको प्रमुख जिल्ला अधिकारी बस्नेतले बताए ।
बाँकेको नेपालगञ्जबाट रुकुमको राडी बजारतर्फ जाँदै गरेको भे १ ख १३२९ नम्बरको बस बिहीबार साँझ जाजरकोटको भेरी नगरपालिका–१ को खलङ्गा रिम्ना सडकखण्डको पिपे भन्ने स्थानबाट भेरी नदीमा खसेको थियो । घटनाबारे विस्तरित जानकारी आउन बाँकी छ ।
