रुकुम । रुकुम पश्चिममा प्रहरीमाथि आक्रमण हुँदा दुई जना घाइते भएका छन् । ईलाका प्रहरी कार्यालय बाँफिकोट गाउँपालिका–३, स्यार्पुमा ड्युटीमा खटिएका प्रहरीमाथि आक्रमण हुँदा प्रहरी जवान महेन्द्र बहादुर शाही र हिमराज खड्का घाइते भएका हुन् ।
कुटपिटमा जिल्लाको बाँफिकोट गाउँपालिका–५ का ३४ वर्षीय हिरालाल केसीमाथि बाँफिकोट गाउँपालिका–३ का २७ वर्षीय गोविन्द बिक, वडा नम्बर –४ का २२ वर्षीय लक्ष्मण बिक, २० वर्षीय सञ्जु खड्का लगायत अन्य १२–१३ जनाको समूहले कुटपिट गर्दै गरेको सूचना पाएपछि प्रहरीटोली घटनास्थल पुग्दा उल्टै प्रहरीमाथि कुटपिट भएको जिल्ला प्रहरी कार्यालय रुकुम पश्चिमका सूचना अधिकारी प्रहरी निरीक्षक धर्मेन्द्र खड्काले बताए ।
हिजो बेलुका भएको उक्त घटनास्थलमा प्रहरी नायव निरीक्षक शोभा सिंह थारुको कमान्डमा चार जनाको प्रहरीको टोली घटनास्थल पुगेको निरीक्षक खड्काले बताए । घटनास्थलमा पुगेर सम्झाइ–बुझाइ गर्न खोज्दा उल्टै प्रहरीमाथि आक्रमण भएको उनको भनाई छ ।
आक्रमणमा परी घाइते भएका प्रहरी जवान शाहीको ढाडमा र खड्काको टाउकोमा ठुलो चोट लागेकाले थप उपचारका लागि कोहलपुर मेडिकल कलेजमा पठाइएको छ ।
प्रहरीमाथि आक्रमण गर्ने व्यक्तिहरू फरार रहेको र उनीहरूको खोजी कार्य भइरहेको निरीक्षक खड्काले बताए ।
