नेकपा अध्यक्ष प्रचण्डको ‘गणतन्त्रको पहिलो दशक’ पुस्तक सार्वजनिक


काठमाडौं । सत्तारुढ नेकपाका अध्यक्ष तथा पूर्व प्रधानमन्त्री पुष्पकमल दाहाल ‘प्रचण्ड’को ‘गणतन्त्रको पहिलो दशक’ पुस्तक सार्वजनिक भएको छ । उनले  संविधानसभा र व्यवस्थापिका संसदमा व्यक्त गरेका विचारहरुको सँगालो ‘गणतन्त्रको पहिलो दशक’ बिहीबार सार्वजनिक गरिएको हो ।

प्रचण्डले उक्त पुस्तकमा २०६५ देखि २०७५ सालसम्म संविधानसभा र व्यवस्थापिका संसदमा आफूले व्यक्त गरेका विचारहरुलाई  ४२ शीर्षकमा समेटेका छन् ।

संसदीय राजनीतिबाट सशस्त्र युद्धमा लैजान सक्ने, सशस्त्र युद्धलाई शान्तिपूर्ण रुपान्तरण गराउन सक्ने, सशस्त्र युद्ध र शान्तिपूर्ण जनआन्दोलनलाई संयोजन गराउन सक्ने, जनयुद्ध र जनआन्दोलनले उठाएका संघीयता, गणतन्त्र, समावेशी, समानुपातिक प्रतिनिधित्व, धर्मनिरपेक्षता जस्ता मुद्दालाई संस्थागत गर्ने नयाँ संविधानको ‘कोरियोग्राफर’ को भूमिका खेल्दा भोग्नु परेका उथलपुथलकारी परिघटना व्यक्त भएको यो पुस्तक आफैंमा एउटा ऐतिहासिक दस्तावेज हो ।

२ सय ४० बर्ष लामो राजतन्त्रलाई परास्त गरी संघीय लोकतान्त्रिक गणतन्त्रलाई संस्थागत गर्ने संविधान निर्माण र त्यो संविधान अन्तर्गत रहेर स्थानीय, प्रादेशिक र संघीय निर्वाचन गराउन भोगिएका पेचिला परिघटना र संघर्षलाई पनि अध्यक्ष प्रचण्डले पुस्तकमा समावेश गरेका छन् ।

सत्तामा रहँदा प्रतिपक्षलाई सँगै लिएर हिड्न सक्ने, प्रतिपक्षमा रहँदा सत्ता पक्षसँग मिल्न सक्ने लचकदार समय र परिस्थितिको तत्काल बोध गर्न सक्ने नेताको रुपमा खेलिएको भूमिकालाई उनको पुस्तकमा बढ्न पाइने छ ।

त्यस्तै पुस्तकमा विभिन्न राजनीतिक शक्तिहरुबीच भएका संघर्ष, पुरानो व्यवस्थाको प्रतिनिधित्व गर्ने वर्ग, संस्कृति र विचारसँगको टकराव एवम् रुपान्तरणका अनेक प्रयास अभिलिखित छन् ।

अध्यक्ष प्रचण्डले पुस्तक प्रकाशनका निम्ति अहोरात्र खट्नुहुने पार्टीका नेता, कार्यकर्ता र सचिवालयका सम्पूर्ण सदस्यहरुलाई धन्यवाद दिएका छन् । त्यसैगरी अध्यक्ष प्रचण्डले यस पुस्तक प्रकाशनका निम्ति घच्घचाउने पत्रकार, वुद्धिजीवि र शुभेच्छुकहरुमा कृतज्ञता पनि व्यक्त गरेका छन् ।

प्रज्ञा स्मृति प्रतिष्ठानले प्रकाशन गरेको पुस्तकमा ३८५ पृष्ठहरु रहेका छन् भने यसको मूल्य रु.५ सय रहेको छ । पुस्तक राजधानी काठमाडौं लगायत देशका विभिन्न सहरहरुका पुस्तक पसलहरुमा उपलब्ध छ ।

तपाईको प्रतिक्रिया

सम्बन्धित समाचार