काठमाडौं । नेपाली क्रिकेटर सन्दीप लामिछाने इण्डियन प्रिमियर लिग (आईपीएल) बाट आज स्वदेश फर्किदैछन् । सन्दीपले खेलिरहेको टिम प्रतियोगिताबाट बाहिरिएपछि उनि घर फर्किन लागेका हुन ।
नेपाली राष्ट्रिय क्रिकेट टोलीका लेग स्पिनर सन्दीप एयर इन्डियाको विमानमार्फत आज दिउँसो साढे २ बजे त्रिभुवन अन्तर्राष्ट्रिय विमानस्थल आइपुग्ने नेपाली राष्ट्रिय टोलीका टिम व्यवस्थापक रमन शिवाकोटीले जानकारी दिए।
सन्दिपले दिल्लीबाट यो संस्करणको आईपीएलमा ६ खेल खेल्दै ८ विकेट लिन सफल भएका थिए। फाइनल प्रवेशका लागि गएराति भएको दोस्रो क्वालिफायरमा सन्दिपको टिम दिल्ली महेन्द्रसिंह धोनीको चेन्नई सुपर किङ्ससँग पराजित हुँदै प्रतियोगिताबाट बाहिरिएको थियो।
सन्दिपले भारतमा जारी १२ औं संस्करणको आईपीएलमा दिल्ली क्यापिटल्सबाट दोस्रो सिजन खेलेका हुन्।
नेपाल फर्किन लाग्दै गर्दा सन्दीपले आफ्नो टिम, कोच, खेलाडी साथीहरु, टिम म्यानेजमेन्ट लगायत आफ्ना शुभ चिन्तकहरुलाई सम्झिदै धन्यवाद दिएका छन् । सन्दीपले आफ्नो अफिसियल पेजमा उक्त कुरा लेख्दै यसपालीको खेल आफ्ना लागि निकै सिकाईपुर्ण र राम्रो अनुभव मिलेको समेत बताएका छन् ।
