काठमाडौं । नेपाली राष्ट्रिय फुटबल टोलीका स्ट्राइकर विमल घर्ती मगरले ‘ए डिभिजन लिग’ का बाँकी खेल नखेल्ने भएका छन् ।
यसै वर्षदेखि ए डिभिजन लिगमा डेब्यु गरेका विमल ट्रायल दिन बेल्जियम जाने भएपछि लिगका बाँकी खेल नखेल्ने भएका हुन् ।
च्यासल युथ क्लबका स्ट्राइकर विमल ट्रायलका लागि बुधबार बेल्जियम जादैछन ।
बेल्जियम जाने भएपछि विमलले च्यासलसँगको सम्झौता सहमतिमा रद्द गरेको उनले आफ्नो फेसबुकपेज मार्फत जानकारी दिएका छन् ।
फेसबुकमार्फत उनले ए डिभिजन लिगमा डेब्यू गर्दा खुसी लागेको समेत बताएका छन् ।
भारत, बेल्जियम र नेदरल्याण्डसमा समेत व्यावसायिक फुटबल खेलिसकेका विमल ‘ए’ डिभिजन लिगमा भने यसै वर्षदेखि डेब्यु गरेका हुन् । विमलले यसअघि विसं २०७१ को राष्ट्रिय लिगमा सुदूरपश्चिमबाट खेलेका थिए ।
सन् २०१२ को एएफसी यू–१४ फेस्टिभलमा राम्रो प्रदर्शन गरेपछि उनलाई राष्ट्रिय टोलीका तत्कालीन प्रशिक्षक कृष्ण थापाले १४ वर्षकै उमेरमा राष्ट्रिय फुठवल टोलीबाट खेलाएका थिए ।
