मलाई आजभोलि कुकुर हुन मन छ
किनकि मान्छेको स्वरूपमा जन्मेर
मन्दिरमा पूजा गर्न नपाएको मैले ,
एक खुट्टा उचालेर कम्तिमा मन्दिरमा
‘सु-सु’ गर्न सक्छु ! तिहारमा पूजिन सक्छु ।
अनि तिम्रो भात भान्सामा ओहर दोहर गर्न सक्छु,
आधुनिक भनिनेहरूको काखमा ‘लुटुपुटु’ हुन सक्छु ।
चिल्ला गाडीहरूको झ्यालमा मुन्टो निकालेर,
सडकपेटीमा हिड्ने मान्छेलाई जिस्काउन सक्छु ,
‘मान्छे भन्दा कुकुर वफादार’ भन्ने प्रशंसा सुन्न सक्छु !
म मान्छे भइकन ‘ डेरावाल’ जीवन बिताउनेले,
सौखिनहरूको गेटमा बन्ने ‘खोर’ को भए पनि,
कम्तिमा ‘मालिक’ त हुन सक्छु ।
त्यसैले मलाई हिजो आज ‘कुकुर’ हुन मन छ ।
