काठमाडौं । सभामुख अग्निप्रसाद सापकोटाले संसद विघटनको असंवैधानिक र अलोकतान्त्रिक कदमप्रति गम्भीर ध्यानाकर्षण भएको बताएका छन् ।
शनिवार एक विज्ञप्ति जारी गर्दै सभामुख सापकोटाले अन्य विकल्प हुँदा हुँदै कोरोना महामारीमा जनतालाई समेत आर्थिक भार पर्नेगरी आवधिक चुनावको घोषणा गर्नु असंवैधानिक कदम भएको बताएका छन् ।
संविधानको धारा ७६ (५) अनुसार वैकल्पिक सरकार गठनका लागि वस्तुगत आधार पेश भइसकेको अवस्थामा प्रधानमन्त्री नियुक्त गर्ने विकल्प रहँदा रहँदै सार्वभौम प्रतिनिधि सभा विघटनको निष्कर्षमा पुग्नु कदापि स्वाभाविक र संवैधानिक कदम मान्न सकिने अवस्था रहँदैन, जारी विज्ञप्तिमा उल्लेख छ ।
कोभिड–१९ महामारीको भयावह परिस्थिति भोगिरहेका नागरिकका लागि यसको रोकथाम, नियन्त्रण र उपचार सर्वाधिक प्राथमिकताको विषय भएको उल्लेख गर्दै सभामुख सापकाटाले नयाँ राजनीतिक संकटले मुलुकको प्राथमिकता बदलिने र महामारीबाट नागरिकको जीवन थप जोखिममा पर्ने खतरा बढाउने बताए।
“कोरोना महामारीसंग जुधिरहेको संकष्टमा चुनाव घोषणाले मुलुक र जनतालाई थप आर्थिक भार पर्ने अवस्था सृजना हुने उनको भनाई ।
कोभिड–१९ महामारीको भयावह परिस्थिति भोगिरहेका नागरिकका लागि यसको रोकथाम, नियन्त्रण र उपचार सर्वाधिक प्राथमिकताको विषय हो । तर, नयाँ राजनीतिक संकटले मुलुकको प्राथमिकता बदलिने र महामारीबाट नागरिकको जीवन थप जोखिममा पर्ने खतरा बढाउने छ । साथै मुलुक र जनतालाई थप आर्थिक भार पर्ने अवस्था पनि सृजना हुनेछ”, विज्ञप्तिमा उल्लेख छ।
सभामुख सापकोटाले प्रधानमन्त्री र राष्ट्रपतिद्धारा चालिएको असंवैधानिक कदमले लोकतन्त्र नै खतरामा परेकाले राष्ट्रिय हित, संवैधानिक सर्वोच्चता र लोकतन्त्रको रक्षाका लागि फेरी एकपल्ट सबै एकजुट हुन अपिल गरेका छन् ।
“फेरि एकपल्ट, राष्ट्रिय हित, संवैधानिक सर्वोच्चता र लोकतन्त्रको रक्षाका लागि राजनीतिक दलहरु, माननीय सांसदहरु, नागरिक समाज, संविधानविद्, कानुन व्यवसायी, बुद्धिजीवी, सञ्चारजगत् तथा सम्बद्ध सबै पक्षलाई एकजुट हुन हार्दिक अपिल गर्दछु”, जारी विज्ञप्तिमा उल्लेख छ।
सभामुखद्धारा जारी विज्ञप्ति
