कैलाली । कैलालीको लम्कीमा मंगलबार बिहान ट्रकको ठक्करबाट एक जना छात्राको मृत्यु भएको विषयमा भएको प्रदर्शनले उग्र रुप लिएको छ ।
पूर्वबाट पश्चिमतर्फ जाँदै गरेको ना ७ ख ९२३३ को ट्रकको ठक्करबाट लम्की बहुमुखी क्याम्पसमा अध्ययनरत छात्रा सुनिता रावलको मृत्युभए पछि प्रदर्शन गरिएको थियो ।
प्रदर्शनकारीले तोडफोडका साथै प्रहरीमाथि ढुंगा प्रहार गरेका छन् । प्रदर्शन नियन्त्रण बाहिर गएपछि प्रहरीले लाठीचार्ज गर्नुका साथै दर्जनौं सेल अश्रु ग्यास हानेको छ । लम्कीबजार तनावग्रस्त भएको छ भने प्रदर्शनमा केही प्रहरी र स्थानीय घाइते भएका छन् ।
लम्कीमा अहिले प्रदर्शनलाई नियन्त्रणमा लिनका लागि प्रहरी परिचालन गरिएको कैलालीका प्रहरी प्रमुख प्रहरी उपरीक्षक आभूषण तिम्सिनाले जनाकारी दिएका छन् ।
प्रदर्शनकारीले चालकको लापरवाहीले ज्यान गएको भन्दै ट्क तोडफोड गर्नुका साथै विहानै देखि सडक समेत बन्द गराएका छन् । उनीहरुले दोषीमाथि कारबाही गर्नुका साथै मृतकका परिवारलाई क्षतिपूर्ति दिनुपर्नेलमाग गरेका छन् । प्रहरीले ट्रक चालक सुनील भण्डारीलाई नियन्त्रणमा लिएको छ ।
