ओखलढुंगा । बलात्कारको आरोप लागेका १६ वर्षीय बालकलाई सुधार गृहमा राखेर अनुसन्धान गर्न अदालतले आदेश दिएको छ ।
नाताले भाञ्जी पर्ने ७ वर्षीया बालिका बलात्कार गरेको आरोपमा पक्राउ परेका एक १६ वर्षीय बालकलाई सुधार गृहमा राखेर अनुसन्धान गर्न जिल्ला अदालत ओखलढुंगाले आदेश दिएको हो ।
दिदीको घर गएको समयमा भदौ ३ गते बालिका बलात्कार गरेको आरोपमा भदौ ४ गते पक्राउ परेका बालकलाई जिल्ला अदालतका न्यायाधीश बलबहादुर केसीको इजलासले सुनुवाइ गर्दै विराटनगरस्थित बाल सुधार गृहमा राखेर मुद्दाको अनुसन्धान गर्न शुक्रबार आदेश दिएको थियो ।
अदालतका श्रेस्तेदार नेत्रबन्धु पौड्यालका अनुसार नाबालकलाई थुनामा अन्य व्यक्तिसरह नराख्ने प्रावधान अनुसार विराटनगर पठाइएको हो। बालिकालाई फकाइफुल्याइ बलात्कार गरिरहेको अवस्थामा अभिभावकले फेला पारेर आारोपित बालकलाई प्रहरीमा बुझाएका थिए।
