काठमाडौं। भारतको रहेको सामाजिक संस्था गोवा नेपाली समाजले मृगौला रोगबाट पीडित काभ्रेको मण्डनदेउपुर नगरपालिका–१२ ज्याम्दीका कान्छाबहादुर पराजुलीलाई आर्थिक सहयोग हस्तान्तरण गरेको छ ।
आज काठमाडौंस्थित रिपोर्टर्स क्लब नेपालमा पत्रकार सम्मेलन गर्दै गोवा नेपाली समाजका अध्यक्ष प्रकाश थापा पुन र भगवती बागेश्वरी टुर्स एण्ड ट्राभल्स प्रा.लि. नेपालगञ्जकी अध्यक्ष एवं प्रगतिशील नेपाली समाज भारतकी केन्द्रीय सचिवालय सदस्य अनु विसीले संयुक्त रुपमा पीडित पराजुलीलाई उक्त रकम हस्तान्तरण गरेका हुन् ।
गोवा नेपाली समाजले उपचारका लागि संकलन गरेको जम्मा रकम नेपाली रु. २ लाख २२ हजार ४ सय ४८ मृगौला रोग पीडित पराजुलीलाई हस्तान्तरण गरेको हो।
जसमा भगवती बागेश्वरी टुर्स एण्ड ट्राभल्स गोवा समितिका उपाध्यक्ष होमराज केसीको अगुवाइमा समितिको तर्फबाट भारतीय रु. २६ हजार ७७८ र नेपाल समितिबाट भारतीय रु. १० हजार गरि गोवा नेपाली समाजलाई भारतीय रु. ३६ हजार ७७८ (नेपाली ५८,८४४) बुझाएको अध्यक्ष थापा पुनले पत्रकार सम्मेलनमा जानकारी दिए ।
पराजुलीको उपचारका लागि नेपाल लगायत भारतका विभिन्न ठाउमा रहेका नेपालीहरुले आर्थिक सहयोग गरेका थिए ।
भारतको गोवा लगायत अन्य ठाउमा रहेका नेपालीहरुका दुख पीडा समस्यामा सहयोग गर्दै आएको गोवा नेपाली समाजले पराजुलीलाई पनि उपचारमा सहयोग गरेको अध्यक्ष थापा पुनले बताए । सामाजिसंजाल मार्फत पीडित सम्पर्कमा आएका र त्यसबारे बुझ्न आफु गोवाबाट काठमाडौं आएर बिरामी भेटेपछि आर्थिक सहयोग संकलनको थालनी भएको उनले बताए ।
भारतको गोवामा रहेर आफुहरुले समस्यामा परेका नेपालीहरुलाई सकेको सहयोग गर्दै आएको जानकारी पनि दिए ।
त्यस्तै कार्यक्रममा बोल्दै अध्यक्ष विसीले पराजुलीको उपचारका लागि आफुहरुले गरेको सहयोगले केहि राहात भएपनि उनको जिवन रक्षाका लागि सरकारले नै सहयोग गर्नु पर्नेमा जोड दिइन् । भारतको बुम्बई नासिकमा रहेर आफुहरुले नेपालीहरुका विभिन्न समस्या समाधानका लागि काम गरिरहेको बताईन् ।
वैदेशिक रोजगारीमा गएका बेला सात बर्षअघि बिरामी भएर घर फर्किएका पराजुलीको मृगौलाले काम नगरेपछि उनि थला परेका थिए । काठमाडौंका विभिन्न अस्पतालहरुमा स्वास्थ्य जाँच गर्दा सुरुमा रोग पत्ता लगाउन नै धेरै पैसा खर्च भएको बताउँदै पराजुलीले अहिलेसम्म आफ्नो उपचारमा सम्पुर्ण सम्पत्ती सकिएको बताए । भक्तपुर मृगौला प्रत्यारोपण केन्द्रमा डायलाशिस गराइरहेका पराजुलीले आफुले औषधी किन्न समेत नसक्ने अवस्था रहेको बताए ।
उपचारका लागि मृगौला प्रत्यारोपण गर्नुपर्ने डाक्टरहरुले सुझावअनुसार आफु नै मृगौला दिन तयार रहेको भएपनि खर्चको अभावले गर्न नसकेको पराजुलीकी श्रीमती सुष्माले बताईन् । श्रीमानको जिवन रक्षाका लागि सरकारदेखि विभिन्न निकायमा सहयोगको याचना गरेपनि सहयोग नपाएको उनले गुनासो गरिन् ।
पराजुली दम्पती माओवादी जनयुद्धका पूर्व लडाकु समेत हुन् । सरकारले उपचारका लागि विभिन्न आश्वासन दिएपनि नगरेको उनिहरुको गुनासो छ ।
डाक्टरहरुले बताएअनुसार मृगौला प्रत्यारोपणका लागि करिब २० लाख खर्च लाग्ने सुष्माले बताईन् । अहिलेसम्म उपचार गर्दा आफुसंग भएको सबै सर सम्पत्ती सकिएकाले श्रीमानको जिवन रक्षाका लागि आर्थिक सहयोग गर्दिन उनले अपिल समेत गरेकी छन् ।
पीडित पराजुलीले आफ्नो उपचारका लागि रकम संकलनमा सहयोग गर्ने गोवा नेपाली समाज लगायत सहयोगी सम्प्पुर्णलाई धन्यवाद ज्ञापन गरेका छन्।
पीडित पराजुलीको उपचारमा भइरहेको कठिनाइका बिषयमा अनमोलपोस्टले समाचार प्रकाशन गरेको थियो ।
