भारत । भारतको कर्नाटक राज्यको गुलवर्गा जिल्ला अन्तर्गत अवजलपुरको तलका भन्ने ठाउँमा सवारी दुर्घटनामा परी एकै परिवारका पाँच नेपालीको मृत्यु भएको छ । मृत्यु हुनेमा पश्चिम सुर्खेतको चौकुने गाउँपालिका ७ का अमलाटाकुराका अन्दाजी २७ वर्षीय रतन नेवार, उनकी श्रीमती २५ वर्षीय अस्मिता नेवार, उनका छोरा ५ वर्षीय मिलन नेवार, अर्का छोरा २ वर्षीय धड्कन नेवार र भाइ बुहारी सुस्मिता नेवार रहेका छन् ।
सुर्खेतको चौकुने गाउँपालिका ७ का उनीहरु एउटै मोटरसाइकलमा सवार रहेका थिए । गोवा जाने मुख्य सडकमा ट्रकले मोटरसाइकललाई ठक्कर दिएर उनीहरुको घटनास्थलमै मृत्यु भएको हो । पाँचै जना रोजगारीको सिलसिलामा भारत रहेका थिए ।
स्थानीयका अनुसार मृतक रतनका दाइ त्यहाँकै एक अस्पतालमा उपचाररत थिए । उनीहरू स–परिवार बिरामीलाई अस्पतालमा भेट्न गएका थिए । भेटेर फर्किने बेलामा ट्रकले ठक्कर दिँदा दुर्घटना भएको हो।
