ललितपुर। ललितपुर जिल्ला अदालतकी नायब सुब्बा पे्रमिका तामाङलाई कुटपिट गर्ने अधिवक्ता अमिर लामिछाने पक्राउ परेका छन्।
महिला कर्मचारीमाथि अदालतको कार्यकक्षमै हातपात गरेर भाग्न खोजेका लामिछानेलाई नियन्त्रणमा लिई ललितपुर प्रहरीको जिम्मा लगाएको छ । पीडित तामाङले लामिछानेविरुद्ध जिल्ला प्रहरी परिसर ललितपुरमा जाहेरी दिइसकेकी छन् । लामिछानेमाथि प्रहरीले अनुसंन्धान र कारवाही प्रकृया सुरु गरेको जनाएको छ ।
अधिवक्ता लामिछानेले मुद्दाको मिसिल र आदेश हेर्न फाइल लिन खोजेपछि सुब्बा तामाङले मिसिल बाहिर लान मिल्दैन भन्दा उनीमाथि मुक्का प्रहार गरेका थिए ।
लामिछानेको मुक्का प्रहारबाट अगाडीको दुईवटा दाँत हल्लिनुका साथै ओठमा चोट पुगेको तामाङले बताइन्। लामिछानेले तामाङलाई लछारपछार गर्दै उनको सरकारी पोसाकको बाहुलासमेत च्यातिदिका थिए ।
पुनमाया महर्जन वादी र बद्री देशार प्रतिवादी भएको दूषित लिखत निर्णय दर्ता बदर मुद्दामा वारेस रहेका अधिवक्ता लामिछानेले तारेख लिने क्रममा मिसिल तानी आफैँ कागजातहरू पल्टाई हेर्न थालेकोमा ‘मिसिल नहेर्नुस्, कागजातहरू हराउँछ, अहिले भिडभाड छ तपाईंलाई आवश्यक भए नक्कल सारी हेर्नुहोला’ भनेपछि लामिछानेले ‘तँ धेरै जान्ने हुन्छेस्, तँ को हो ? तँलाई देखाउँछु’ भन्दै मुख छाडेर अपशब्द बोल्दै गालीगलौज गरी सुब्बा तामाङमाथि हातपात गरेका थिए।
पीडित तामाङले आफुमाथि हातपात गर्ने लामिछानेलाई कडा कारबाही हुनुपर्ने बताएकी छन् । अनमोलपोस्टसंग टेलिफोनमा संक्षिप्त कुरा गर्दै उनले लामिछानेको लाइसेन्स खारेज गरी हदैसम्मको कारवाही हुनुपर्ने माग गरिन् । तामाङमाथि भएको हातपात घटनाको एकीकृत सरकारी कर्मचारी संगठन नेपालले घोर भत्सना गर्दै दोषीमाथि हदैसम्मको कारवाहीको माग गरेको छ ।
