सिरहा । गर्मीयाम सुरु भएसंगै आगलागीका घटनाहरु बढ्न थालेका छन् । सिरहामा भएको आगलागीमा तीन जनाको मृत्यु भएको छ । शनिबार भएको छुट्टाछुट्टै आगलागीका घटनामा दुई बालिकासहित तीनजनाको मृत्यु भएको प्रहरीले जनाएको छ ।
धनगढीमाई नगरपालिका–१४ अमिलटारस्थित दीपक धमलाको गोठमा साँझ आगलागी हुँदा दीपककी ६ वर्षीया छोरी दीक्षा र नित्यराज पोखरेलको ७ वर्षीया छोरी ऋतुको जलेर मृत्यु भएको इलाका प्रहरी कार्यालय लहानका प्रहरी नायब उपरीक्षक राजेश थापाले जानकारी दिए ।
आगलागीको कारण भने खुल्न सकेको छैन। स्थानीय र प्रहरीको सहयोगमा डेढ घण्टापछि आगो नियन्त्रणमा लिएको प्रहरी नायब उपरीक्षक थापाले बताए ।
त्यसैगरी आजै बिहान सिरहाको कल्याणपुर नगरपालिका–७ भेडियो पूर्वारी टोलमा आगलागीमा परी स्थानिय ५० वर्षीया बनारसी देवी सदायको मृत्यु भएको थियो ।
